Ginkatingala sang manugbaligya sang talaba ang wala ginalauman nga pagkuha sang ila nga baligya sa Jalandoni Street, malapit sa Iloilo Terminal Public Market kaina sang aga, Setyembre 4.
Ini matapos kuhaon sang nagpatigayon sang clearing operations ukon ginapahayag personnel sang Local Economic and Enterprise Office ang ila apat ka sako nga talaba.
Sa interview sang Bombo Radyo kay Christopher Catalan, driver sang truck nga ginakargahan sang talaba, iya ginapahayag nga nahamtang sa ibabaw sang truck ang talaba kag ginkakibot na lang sini nga ginkuha ini.
Suno pa kay Catalan, wala man sang dokumento nga ginpresentar ang amo nga clearing team bilang abiso sa pagkuha sa ila baligya.
Gin-ako man sini nga nag-obstruct ang truck kun sa diin nahamtang ang talaba apang dapat suno sa iya gin-ticketan na lang ini kag wala ginkuha ang ila nga inugbaligya.
Ginkadismaya naman nila nga wala na nabakal nga ila nga baligya rason nga magapauli ang mga ini nga wala sang dala nga kwarta sa ila tagsa ka pamilya bangud sa natabo.
Ginpalab-ot naman sang Bombo Radyo sa LEEO ang amo nga problema kag nagahulat na lamang sang sabat halin sa ila.
