ILOILO – Patay ang menor de edad nga manugbantay sang bibe matapos gintiro sang iya amo sa Brgy. Santol, San Dionisio, Iloilo.
Ang biktima amo si Alyas Jose, 15, estudyante, samtang ang suspek naman amo si Alyas Pedro, 49, mangunguma, kag lunsay residente sang nasambit nga barangay.
Sa interview sang Bombo Radyo kay Police Captain Edward Villanis, Hepe sang San Dionisio Municipal Police Station, iya ginpahayag nga naga inom-inom ang biktima kag suspek.
Sa ulihi, ginsunlog sang suspek ang biktima nga “Alyas black”.
Apang napikon ang biktima kag nagpanghangkat nga maglabu-anay sa suspek.
Diri na kag nagpauli ang suspek kag nagkuha sang pusil kag ginluthang ang biktima sa nawala kag natuo nga dughan nga naglapos sa likod.
Arestado naman ang suspek matapos gin-negosyar sang ila Punong Barangay nga mag-surrender.
Posible naman nga magapangatubang sang kaso nga murder ang suspek.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗣𝗵𝗮𝘂𝗹𝗶𝗻𝗲 𝗣𝗶𝗹𝗹𝗼𝗿𝗮
