Nasapwan nga wala na sang kabuhi kag tadtad sang bala ang manugbantay sang pantatan sa Sitio Bulod 2, Barangay Pulao, Dumangas, Iloilo.
Ang biktima amo si Jomarie Torres, 32, residente sang Brgy. Cabilauan, Barotac Nuevo.
Sa interview sang Bombo Radyo kay Police Master Sergeant Jhon Mark Tuazon, imbestigador sang Dumangas Municipal Police Station, iya ginpahayag nga base sa imbestigasyon, nag-inom-inom pa ang biktima sa balay sang tag-iya sang pantatan nga ginabulubanta 300 metros ang kalayuon sa payag inoras antes nagluntad ang insidente.
Suno sa mga residente, may nabatian sila nga lupok sang ‘las 11 sang Pebrero 9, apang hapon na sang Pebrero 10 nakit-an ang lawas sini sang nagbisita ang utod sang tag-iya sang pantatan.
Ginabulubanta walo ka gunshot wounds ang naagum sang biktima nga posible nga igo sang 12-gauge shot gun.
Wala pa sa gihapon madakpan ang suspek kag padayon pa ang imbestigasyon sang kapulisan kun ano ang motibo sang pagtiro-patay sa biktima.
Nahibaluan nga tatlo ka bulan na nga nagatinir ang biktima sa nasambit nga lugar.#
(Article: Bombo Phauline Pillora)
