ILOILO CITY-Dako ang pagpati ni Loramae Gallardo sang Zarraga, Iloilo nga buhi pa ang iya bana nga si Marlo Gallardo nga sakay man sa Gulf Livestock 1 nga naglugdang sa Japan.
Sa interview sang Bombo Radyo kay Gallardo, Setyembre 1 sang ulihi nga komunikasyon sang iya bana sa iya apang ginpanumdom niya nga mahimo nga mahina lamang ang signal kag wala naman niya ini nakontak sa mismo ika-29 nga kaadlawan sang iya bana kahapon, Setyembre 4.
Nagapangabay naman sang bulig si Gallardo para mas mapadasig ang rescue operations kag ang pagpagwa sang impormasyon tuhoy sa kahimtangan sang iya bana kag iban pa nga mga kaupdanan sini sa barko.
Nahibaluan nga manugbata subong nga Setyembre si Gallardo kag nagalaum ini nga makapauli nga buhi ang iya bana kag makit-an ang iya anak.
