ILOILO – Pilason ang isa ka lalaki matapos naigo sang kilat samtang nagapangisda sa baybayon sang Brgy. Balabago, San Joaquin, Iloilo.
Ang biktima amo si Arnel Raymundo, 46, tumandok sang amo nga lugar.
Sa interview sang Bombo Radyo kay Police Captain Felix Perez , hepe sang San Joaquin Municipal Police Station, iya ginpahayag nga wala gid nalikawan nga naigo si Raymundo sang kilat samtang nagapangisda sa lawod bangud sang tuman ka kalain nga tyempo kag mabaskog nga ulan nga may dala nga pagpangilat kag pagpanaguob.
Ginpahayag man sini nga naga-isahanon nga nagapangisda si Raymundo kag nalipong ini sang 30 minutos matapos na-igo sang kilat.
Napaso naman ang tuhod sini bangud sa kilat.
Sa subong, yara sa San Joaquin Mother Child Community Hospital ang biktima kag ginadapatan sang nagakaigo nga pagbulong.
