Dehydrated, indi halos makahambal, maluya, kag tuman ka niwang.
Ina ang sitwasyon sang 50-anyos nga manugpangisda sang nakit-an ini sa tunga sang dagat nga sakop sang Batanes matapos nga 46 ka adlaw nga na-report nga missing.
Ini amo si Robin Dejillo nga nakasakay pa sa gamay sini nga sakayang-pandagat sang tion nga nakit-an siya sang crew sang isa ka cargo boat.
Nakalampuwas ini sa masobra isa ka bulan nga pagtinir sa dagat paagi sa pag-inom sang tubig-ulan kag pagmantinir sa isda nga iya nahulik. Ginkaon man sini ang bunga sang niyog nga nakit-an niya nga nagalutaw sa dagat.
Base sa incident report sang Coast Guard District Southern Tagalog sang Agusto 12, ginpahayag nga kaupod si Dejillo sa crew sang fishing boat nga FBca Leah June nga naghalin sa Purok Rosas, Brgy. Dinahican, Infanta, Quezon sang Hulyo 16 para magpangisda sa Pacific Ocean.
Sang Agusto 4 sang aga, nagsakay si Dejillo sa gamay nga support boat nga FBca Leah June para magpangita sang lain nga fishing ground. Wala na ini nakabalik sa mother boat apisar nga ginpaabot kuntani ini sang iya mga kaupdanan nga magbalik sang hapon sang amo man nga adlaw.
Sang ulihi, sang Agusto 10, nagbalik ang iya mga kaupdanan sa Infanta kag gindeklarar nga missing ang ila kaupod.
Insigida nga nagpatigayon ang Philippine Coast Guard (PCG) sang search and rescue operation sa kadagatan nga sakop sang Quezon kag Aurora kun sa diin ulihi siya nakit-an antes na-missing.
Sini lang nga Huwebes, nakaagi ang isa ka cargo boat nga nagabyahe sa Batanes kag gilayon nga nagbulig ang crew sang nakit-an nila ang nagapalangluya nga lalaki nga nagasakay sa gamay sini nga baroto.
Gindala ini sa Batanes General Hospital kag gindapatan sang medikasyon bangud man sa indi maayo nga kondisyon tunga sang malawig nga sinemana nga pagtinir sa tunga sang dagat.#
