ILOILO – Ginapaandaman ni Iloilo Police Provincial Office Director Pol. Col. Roland Vilela ang persona nga naggamit sang iya nga pangalan agud nga magpangayo-kayo sa probinsya sang Iloilo.
Sa interview sang Bombo Radyo kay IPPO Director Vilela, iya ginpahayag nga Agosto 28, isa ka semana antes siya magpungko bilang direktor sang IPPO, ang persona nga nagpakilala nga siya ang nagpangayo sang cellphone number ni Pavia Mayor Luigi Gorriceta bangud may pagahiwaton ini nga medical mission.
Bangud sini, ginhatag man sang mga staff ni Gorriceta ang numero sang alkalde sa nagpakilala nga si Vilela.
Apang matapos sini, nabiktima pa sang manugtunto ang isa ka contractor sa diin nakuhaan niya sang P6,000 para sa cellphone load.
Ang contractor ang para kuntani sa gina-alegar pagpatindug sang balay ni Vilela sa Pavia.
Apang suno kay Vilela, wala siya nakapangayo sang number ni Gorriceta samtang gintawag man niya nga “cheap” ang pagpangayo sang manug-into sang cellphone load kag wala man ag director nagaplano nga magpatindog sang balay.
Naglango-lango pa si Vilela nga sa tion madakpan ang tawo nga naggamit sang iya pangalan, panitan gid niya ini.
Dugang pa sang natungdan, iya na nga ginmanduan ang Pavia Municipal Police Station nga imbestigahan ang natabo nga pagpanunto
