Natalana nga mag-file sang reklamo ang isa ka manunudlo sa Ythai Thani sa Thailand batok sa Grade 11 student nga nagsumbag sa iya sa nawong matapos nga wala nakakuha sang perfect score sa midterm exam.
Suno sa report, ang insidente natabo sa isa ka private school sang wala nagustuhan sang estudyante nga 18 out of 20 ang score sini.
Ginpalapitan niya ang manunudlo kag namangkot kun ngaa indi perfect ang iya score.
Nagpaathag ang manunudlo nga may yara sang requirement nga wala nahimo sang estudyante bisan insakto ang iya mga sabat.
Wala nakontento ang bata kag namangkot pa sa iban nga manunudlo apang pareho man ang iya nabaton nga sabat.
Sang nagbalik ini sa ila kwarto, ginpilit sang bata nga dugangan ang iya score apang namalibad ang teacher.
Liwat ini naggwa kag sang nagbalik, ginpilit niya ang manunudlo nga magpangayo sang pasaylo sa iya apang wala ini ginhimo sang teacher kag sa baylo, ginsabat niya nga ang estudyante ang dapat mag-sorry.
Didto na nagtindog ang estudyante, ginpalapitan ang biktima kag ginsumbag sa nawong sa atubang sang iya nga mga classmates.
Nag-angkon naman sang injury ang manunudlo.
Matapos ang insidente, nangayo sang pasaylo sa teacher ang ginikanan sang bata.
Gin-suspend naman ang amo nga estudyante.
