Ginkilala sang principal sang Carlos Lopez National High School kon sa diin naga-eskwela ang dalagita nga anak sang nabungguan-patay nga mag-asawa sa Barangay Canas, San Dionisio, Iloilo nga isa ka ‘ideal’ nga estudyante ang dalagita.
Ang estudyante nga biktima amo si Angelie, 15, samtang lakip man sa mga nagtaliwan ang iya amay kag iloy nga sanday Artemio Arabe, 64, Rosemarie Asupra, 58, residente sang Barangay Cubay, San Dionisio, Iloilo.
Sa interview sang Bombo Radyo kay Nick Valenzuela, Principal sang Carlos Lopez National High School, iya ginpahayag nga sang nagpasakop si Angelie sa literary musical contest sa ila buluthuan, nagmarka ini sa iya bangud sa manami sini nga tingog kon magkanta.
Suno kay Valenzuela, masami nga ginalaragway sang iya co-teachers nga marespeto kag matinahuron klase nga bata si Angelie.
Ginpahayag man sini nga paagi sa Supreme Student Government sang ila eskwelahan, nagpalibot sila sang donasyon agud nga makabulig sa nabilin nga pamilya ni Angelie.
Ginkasubo naman sang bug-os nga eskwelahan ang pagtaliwan sang amo nga estudyante sa temprano nga panahon.
