Gin-anunsyo ni Ombudsman Jesus Crispin “Boying” Remulla nga napirmahan na niya ang dismissal order batok kay former Senate Sergeant-at-Arms Mao Aplasca.
Wala pa sini ginpatpat kun ano ang rason, apang suno sa iya, isapubliko nila ang amo nga desisyon bangud mabudlay magpaathag.
“Noong Monday, pinirmahan ko na ‘yung dismissal ni Mao Aplasca from the service… Ilalabas namin ang desisyon para makita ng tao dahil mahirap na magpaliwanag,” pahayag ni Remulla.
Matandaan nga sang Mayo, gindagdagan sang anum ka bulan nga preventive suspension si Aplasca kasunod sang lukpanay kag ginamo sa sulod sang Senado sang Mayo 13 antes ang pagpalagyo ni Senator Ronald “Bato” Dela Rosa sang Mayo 14 sang kaagahon.
Pila ka beses man siya nga ginwaswasan anay ni Remulla sa press conference kasunod sang iya pag-ako nga siya ang nag-una nga nagpalupok bilang warning shot nga amo ang gin-umpisahan sang lukpanay sa upper chamber sang amo nga gab-i nga nagbutang sa peligro sa kabuhi sang staff, media, kag iban pa.
Nahibaluan nga may penalidad nga dismissal from service ang isa ka indibidwal nga mapamatud-an nga guilty sang administrative offense. Isa ini sa pinakamabug-at nga administrative penalties nga mahimo madagdag batok sa isa ka opisyal.
Matandaan nga gindepensahan pa anay ni former Senate President Alan Peter Cayetano ang warning shot ni Aplasca paagi sa pagsiling nga ang mga agents sang National Bureau of Investigation (NBI) ang wala nagsunod sa paandam sang mga security personnel kag sa baylo nagpataas sang ila mga armas.
Sang ulihi, nagsiling ang NBI nga posible nga ginplano ukon staged ang amo nga shooting sa Senado sang amo nga gab-i.#
