Hambal nila, ang eleksyon daw hampang lang gid nga indi mo mapaktan kun sin-o ang madaug tubtob matapos ang hampang.
Halimbawa diri amo ang natabo sa Russia kun sa diin isa ka alkalde nga nagpadalagan para sa reelection ang napierde sang iya kasumpong nga asawa sang iya personal nga driver.
Ini amo si Yevgeny Pistsov, ang mayor sang Berezovsky, isa ka satellite city sang Yekaterinburg, sa Sverdlovsk region.
Ang reelection kuntani ni Pistsov, nga nagahandom nga magpungko sa ikapaat nga consecutive term bilang mayor, ang isa ka formality na gid lang kuntani bangud nagpadalagan siya batok sa kaangay nga member man sang United Russia political party ni of Vladimir Putin.
Ang iya kasumpong amo si Yulia Maslakova nga wala man naglaum nga magdaug banugd isa lamang siya ka puppet candidate.
Apang sa kakibot sang tanan, siya ang nagdaug.
Sa Berezovsky, ang mayor ang wala gina- elect direkta sang mga tawo kundi sang mga deputies base sa proposal sang isa ka selection committee.
Ang deputies ang masami nga representatives sang mga local kag regional authorities.
Subong nga tuig, ginsiling nga ginhingyo sang deputies ang selection committee nga tugutan nga mas madamo ang kandidato nga pilian apang sang ulihi sanday Mayor Pistsov kag si Yulia Maslakova lamang ang nagpadalagan.
Sa adlaw sang election gikan sa 23 deputies, 17 ang nagboto pabor kay Maslakova kag anom lang kay Pitsov.
Ginpahayag nga gintuyo pa ni Maslakova nga mag-withdraw apang imposible na bangud nagdaug na siya.
May yara siya subong sang duha ka semana nga mag-take sang oath apang wala siya sang plano nga dayunon ini.
Kun indi magpanumpa si Maslakova, kinahanglan nila nga magpatigayon na lang liwat sang eleksyon.
