Mayorya sa mga pumuluyo sang Barangay Guzman Jesena , Mandurriao, Iloilo City ang handa na nga magpabakuna batuk sa COVID-19.
Ini ang nagguwa sa resulta sang survey sa nasambit nga barangay.
Sa interview sang Bombo Radyo kay Punong Barangay Roseller Paredes, iya ginpahayag nga sadto mahina ukon gamay ang turnout sang mga nagpabor sang pagpabakuna apang liwat nga ginbalik sang barangay officials sa mga pumuluyo ang survey sheet matapos gin-edukar ang mga ini tuhoy sa importansya nga mahatag sang bakuna.
Suno kay Paredes, nagapakita lamang nga kulang sa pagpahangop ang mga pumuluyo rason nga ang iban ang nagapang alang-alang.
Sa subong, 3/4 na sa iya populasyon sa barangay ang nagpasalig nga magpabakuna sa tion nga mangin available na ini sa syudad sang Iloilo.
Sa bahin naman sang Barangay Benedicto, Jaro, Iloilo City, nagalibot ang barangay officials samtang dala ang megaphone bilang estratehiya agud mapalab-ot sa mga pumuluyo ang importansya sang bakuna.
Suno kay Punong Barangay Abelardo Salting, magluwas sa megaphone nga nagapaalinton sa mga pumuluyo, may mga leaflets man nga ginahatag ang mga opisyal sang barangay nga sila mismo ang naghimo agud nga maedukar ang pumuluyo sa COVID-19 vaccination.
Apang gin-athag sang punong barangay nga wala sang pilitay sa pagpabakuna bangud kun sa ulihe mapaminsaran sang iya residente nga magpabakuna na kag may mga supply pa sang COVID-19 vaccines, handa sa gihapon ang barangay nga hatagan sila sang bakuna.
