ILOILO CITY – Iga-demolish na ang maragtason nga Iloilo Freedom Grandstand sa J.M. Basa Street, Iloilo City.
May kaangtanan sini, sa Freedom Granstand ginpatigayon ang flag raising ceremony sang mga empleyado sang Iloilo City Hall bilang ulihi nga aktibidad para sa nasambit nga istruktura.
Magatukod sang bag-o nga Iloilo Freedom Grandstand sa Muelle Loney area samtang buhion naman ang Sunburst Park sa ginatindugan karon sang grandstand.
Paathag sang Ilonggo historian nga si Board Member Demitrio Sonza, importante nga buhion ang Sunburst Park bangud importante nga bahin sang kasaysayan sang Panay ang natabo diri.
Gintawag ini nga Sunburst Park bangud diri nagmartsa ang 40th Sunburst Division sang US Army nga amo ang nag-liberate sang Iloilo sa kamot sang mga Hapon sadtong Marso 21, 1945.
Apang sang nangin senador ang anay alkalde sang Iloilo City nga si Rodolfo Ganzon, nagpasar ini sang layi nga Iloilo Freedom Law sadtong 1953 nga nangin dalan sa pagtukod sang Iloilo Freedom Grandstand.
Nahibaluan nga ang Iloilo Freedom Grandstand ang venue sang mga importante nga kahiwatan sang siyudad, mga political rally kag ini man ang nagaserbe nga main judging area sang Dinagyang Festival.