Nagpanawagan si Philippine National Police (PNP) chief Police General Rommel Marbil sa nauna nga mga PNP chief nga klaruhon na sa publiko ang ila involvement sa kontrobersyal nga drug war ni former President Rodrigo Duterte.
Ginhimo ni Marbil ang mga panawagan matapos ang mga rebelasyon ni retired police colonel Royina Garma sa Kamara lakip na ang payment kag rewards system sa pagpatay sang mga drug suspects.
Suno kay Marbil, seryoso nila nga ginatun-an ini nga mga alegasyon kag gina-imbestigaran man ang mga ginbuyagyag ni Garma agud nga masiguro ang accountability kag transparency.
“We take these allegations very seriously. We will thoroughly investigate Garma’s claims to ensure accountability and transparency within our ranks,” kabahin sang iya statement.
Ginsiling man sini nga nagapreparar na ang kapulisan nga lantawon ang mga alegasyon nga naga-involve man sa former PNP chiefs.
“Our commitment to human rights and accountability is paramount. We must work diligently to regain the trust of the people and ensure that law enforcement operates within the bounds of the law.”
Sa iya affidavit, ginmensyonar man ni Garma sanday Senator Christopher “Bong” Go kag former National Police Commission commissioner Edilberto Leonardo nga involved sa implementasyon sang drug war.
Nagsabat naman diri si Go nga wala sang mga ebidensya ang claims ni Garma; wala sang rewards system suno sa iya; kag nagpanginwala man ini nga siya ang naga-uyat sang kuwarta para sa amo nga sistema.
Nahibaluan nga base sa government record, 6,200 ka drug suspects ang napatay sa mga operasyon sang pulis halin sang Enero 2016 tubtub sang Nobyembre 2023 apang suno naman sa human rights groups, lapaw sa 30,000 ang matuod nga numero bangud may yara sang wala na-report nga mga kaso sang pagpamatay.
Enero 2023 sang naghatag sang otoridad ang International Criminal Court (ICC) para buksan liwat ang imbestigasyon sa amo nga war on drugs.#
