Kumpyansa ang Marcos Jr. administration nga malab-ot ang target sini nga mabuhinan ang kapigaduhon sa Pilipinas kag magatupa na lamang sa single digit ang poverty incidence sa pagtakop sang iya nga termino sa 2028.

Ginpahayag ini ni National Economic and Development Authority (NEDA) Secretary Arsenio Balisacan kasunod sang resulta sang survey sang Social Weather Stations (SWS) kun sa diin 48% ukon 13.2 million ka Filipino families ang nag-rate sang ila kaugalingon nga pigado man gihapon sang Septyembre nga mas mataas sa 45%, ukon sang 12.5 million households sang Hunyo.

(Photo: AFP)

Suno sa NEDA, nagapabilin nga nagatutok ang gobyerno sa prayoridad sini nga buhinan ang kapigaduhon paagi sa ila nga nagkalain-lain nga stratehiya kag whole-of-society approach.

Kun basehan ang 2021 record sang Philippine Statistics Authority (PSA), yara sa 18.1% ang poverty incidence sa Pilipinas ukon halos 20 million ka Filipinos.

Lakip sa nalawagan nga programa sang gobyerno nga ginapatuman subong amo ang rollout sang food stamp program, pagkakas sa pass-through fees para sa vehicles nga nagadala sang partikular nga mga produkto, kag distribution sang cash aid paagi sa Rice Farmers Financial Assistance program.

Ginpahayag man nga ginahatagan sang prayoridad ang mga polisa kag programa nga maka-generate sang dugang kag dekalidad nga mga trabaho nga amo ang pinaka-epektibo sa pagpapas sang kapigaduhon.

“This will involve expanding our markets, improving our infrastructure, and attracting more strategic investments, while also preparing the workforce with the necessary skills for the jobs that will be created,” dugang sang tiglikom. #