Ginaduso sang Marcos administration ang masobra sa P10 billion nga confidential and intelligence funds (CIF) sa idalom sang Fiscal Year 2026 P6.793-trillion National Expenditure Program (NEP).
Suno kay Budget Secretary Amenah Pangandaman, ini nga ginaproponer nga secret funds ang mas manubo sa P12.1-billion nga gin-alokar sa idalom sang 2025 General Appropriations Act.
Kun pahat-pahaton, ang confidential funds yara sa P4.386 billion samtang nagalab-ot naman ang intelligence funds sa P6.398 billion.
Ang confidential funds amo ang alokasyon sa national budget para sa confidential expenses lakip na ang surveillance activities sa civilian government agencies.
Sa pihak nga bahin, ginagamit naman ang intelligence funds sa mga galastuhan nga naangot sa intelligence activities ukon pagtipon sang mga impormasyon para sa military, uniformed personnel, kag iban pa nga intelligence agencies nga ang trabaho para sa seguridad sang Pilipinas.
Suno kay Pangandaman, halos katunga sini nga secret funds ukon P4.5 billion ang magakadto sa Office of the President kag pagasundan sang Department of National Defense nga may P1.848 billion.
Sa pihak nga bahin, wala naman sang CIF allocation para sa Office of the Vice President (OVP) sa ikaduha na nga sunod-sunod nga tuig. Una naman nga nagpahayag si VP Sara Duterte nga wala ini nag-request sang CIF para sa masunod nga tuig.
Matandaan nga sang nagligad nga tuig, bangud nagpamalibad si Sara sa pagsabat sa mga pamangkot kun sa diin gingamit ang iya budget, ginbuhinan sang Kamara ang pondo sang OVP halin sa P2 billion panubo sa P733 million.
