Nahimo nga concert venue ang Kalayaan Grounds sa Malacañang Palace kadungan sang pasidungog nga ginhatag nanday President Ferdinand R. Marcos Jr. kag First Lady Liza Araneta-Marcos sa Filipino healthcare workers agud nga kilalahon ang ila nga mga sakripisyo kag dedikasyon sa trabaho.
Ini nga event nga gintawag nga “Konsyerto sa Palasyo: Para sa ating mga Healthcare Workers” ang nagpakita sang Filipino talents sa pagkanta, pagsaot, kag iban pa nga sahi sang art.
Lakip sa guests sa sini nga event amo ang tatlo ka nurses nga lunsay naka-base sa United Kingdom kag nakabaton ang British Empire Medal para sa ila serbisyo sa healthcare.
Sa amo man nga programa, gin-anunsyo sang organizers ang pila ka mobile health clinics nga gina-distribute sa nagkalain-lain nga local government units bilang kabahin sang health program sang gobyerno.
Lakip naman sa performers amo sanday OPM legend Martin Nievera, theater artist nga si Lara Maigue kag Douglas Nierras Powerdance Group.
Samtang nagakanta sang “Be My Lady”, ginpasa ni Nievera ang mikropono kay President Marcos kag game nga nagsugpon ang chief executive sa chorus nga ginkalipay naman sang tumanlan-aw. Sang ulihi, gin-serenade pa sang Filipino singer ang First Lady.
Sa sini nga event, present man kag yara gid sa unahan ang mga myembro sang Gabinete ni Marcos.
Una nga ginhiwat ang Konsyerto sa Palasyo sang Abril 2023 agud pasidunggan ang mga personnel sang Armed Forces of the Philippines.
