Gin-anunsyo ni President Ferdinand “Bongbong” Marcos Jr. ang distribusyon sang cash assistance kag fuel subsidies para sa mga driver sang pampubliko nga salakyan, mga mangunguma, kag mga manugpangisda.
Ini ang kabahin sang tikang sang gobyerno agud nga mapahagan-hagan ang palas-anon sang mga Pilipino sa tunga sang nagatimbuok nga presyo sang gatong dala sang gyera sa Middle East.
Subong nga Martes, Marso 17, umpisahan na sang Department of Social Welfare and Development ang paghatag sang tag-P5,000 nga ayuda sa 139,000 tricycle drivers sa 17 local government units sa National Capital Region (NCR).
Pagkatapos sini suno sa presidente, makabenepisyo man ang tricycle drivers sa gwa sang Metro Manila amo man ang transport network vehicle service (TNVS) kag jeepney drivers nga makabaton man sang P5,000 cash assistance.
Sa katapusan nga semana sang Marso, ang fuel subsidy naman halin sa Department of Transportation ang magaabot.
SA AGRICULTURE KAG FISHING SECTOR
Agud masiguro naman ang bastante nga suplay sang pagkaon, may P3,000 nga fuel subsidy nga ihatag sa masobra 26,000 ka mga mangunguma sa pungsod.
Sa Huwebes, Marso 19, may ihatag man ang Bureau of Fisheries and Aquatic Resources (BFAR) nga P3,000 nga fuel subsidy sa 26,000 ka mga manugpangisda.
“Sisikapin din ng Department of Agriculture na ipamahagi sa Abril sa bawat magsasaka at mangingisda ang lagpas P2,000 tulong mula sa Presidential Assistance for Farmers and Fisherfolk Program,” suno kay Marcos.
“Magagamit po ito ng mga magsasaka sa kanilang hanapbuhay,” dugang sini.
SA BUSINESS SECTOR
Para naman sa mga negosyo, nagpahayag si Marcos nga buhinan sang Civil Aviation Authority of the Philippines (CAAP) ang passenger service charge, landing, parking, kag iban pa nga fees.
“Ito ay makakatulong para bumaba ang gastos ng mga airline at ang mga pamasahe sa eroplano,” suno sa chief executive.
Panubuon man sang Civil Aeronautics Board (CAB) ang kalawigon sang pag-review sang fuel surcharge halin sa isa ka bulan panubo sa 15 ka adlaw. Ini agud nga mangin madasig ang adjustment sang balayran sa kada magbag-o ang presyo sang jet fuel.
“Ibig sabihin, kapag tumaas ang presyo ng jet fuel, mas kontrolado ang pagtaas ng airfare. At kapag bumaba naman ang presyo ng jet fuel, mas mabilis ding bababa ang pamasahe,” suno pa kay Marcos.
Nagmandu man ini sa mga ahensya sang gobyerno nga irepaso ang mga regulasyon sa paghatag sang lisensya, permits, clearances, kag certifications.
“Tingnan ninyo kung alin dito ang puwede munang suspendihin o ‘di kaya ay babaan ang mga singil upang makabawas sa mga iniintindi ng taong-bayan,” dugang sini.
SA EDUCATION SECTOR
Sa sector sang edukasyon, ginpahanumdom sini nga ginadumilian ang fees and contributions sa mga pampubliko nga eskwelahan ilabi na sa graduation season.
Sa Marso 25, magapatigayon man ang Department of Education (DepEd) sang Serbisyo Fairs. Yara ang government agencies kag employers sa mga eskwelahan agud nga maka-apply ang high school students kag graduates para sa employment kag mas mahapos ang access sa clearances.
“Mga kababayan, ngayon, higit kailanman, kailangan natin ang pagtutulungan ng bawat isa. Walang iwanan, walang maiiwan sa pagharap natin sa hamong ito,” suno pa sa iya video message.
“Asahan ninyo ang patuloy naming paggawa ng mga hakbang upang maibsan ang mabigat na epekto ng kaganapan sa Gitnang Silangan sa taong-bayan,” dugang sini.
“Nawa’y manatili ang ating tiwala sa isa’t isa at ang pananampalataya na malagpasan din natin ang mga pagsubok. Dalangin natin ang kapayapaan at kaligtasan ng lahat. Marami pong salamat,” mensahe pa sini sa mga Pilipino.
