Gindayaw ni President Ferdinand “Bongbong” Marcos Jr. ang ginhimo sang iya anak nga si House Majority Leader Sandro Marcos nga pag-inhibit sa impeachment trial proceedings batok sa presidente.
Suno sa amay nga Marcos, husto lang ang ginhimo ni Sandro bangud bisan ano pa ang ihambal, may bias gid nga matabo bangud anak niya ini.
Kun indi magpartisipar si Sandro sa proseso suno sa iya, amo pa lang kag magguwa nga patas kag husto ang dalagan sang impeachment.
“Tama yung ginagawa niya. That’s very proper dahil I’m his father, siyempre mayroon siyang bias for me,” suno sa chief executive.
“Tama yan na he should remove himself from the process so that the process can be seen to be fair and proper… Ang katotohanan, nabalitaan ko sa news din. Hindi niya sinasabi sa akin,” dugang pa sini.
Si Sandro amo ang representative sang una nga distrito sang Ilocos Norte.
Nagdesisyon ini nga indi magpartisipar sa mga diskusyon, deliberasyon, kag anuman nga proceeding sa House of Representatives rules committee kaangot sa impeachment complaints.
Pahayag sang kongresista, kinahanglan nga panindugan ang integridad sang Kamara, protektahan ang kredibilidad sang proseso, kag palig-unon ang pagsalig sang publiko sa constitutional system.
Nagpahayag man anay ang bata nga Marcos nga dapat nga magpadayon ang Kamara sa paghimo sang constitutional duties sini nga wala sang landing sang anuman nga personal nga interes.
Enero 19 sang una nga gin-file ni Atty. Andre de Jesus ang impeachment complaint batok sa Presidente. Ginsundan ini sang isa pa ka impeachment complaint sadtong Enero 26 paagi sa mga lider sang progresibo nga grupo.
