Nagpaguwa sang statement si President Ferdinand “Bongbong” Marcos Jr. nga nagapanginbulahan kay presumptive United States President Donald Trump kasunod sang projected nga kadalag-an sini sa U.S. presidential elections.
Suno kay Marcos, nagdaog man ang mga Amerikano kadungan sa kadalag-an sang former president, kag ang kadalag-an sini ang pagpakita lamang sa kalibutan sang kabakod sang “American values.”
“President Trump has won, and the American people triumphed, and I congratulate them for their victory in an exercise which showed the world the strength of American values,” kabahin sang press statement.
Ginsiling man ni Marcos nga ginalauman sini nga mag-trabaho kaupod kay Trump sa nagkalain-lain nga isyu nga magabunga sang mutual benefits sa Pilipinas kag Estados Unidos.
Ginlaragway man sini ang duha ka nasyon nga may madalom nga relasyon, may pareho nga ginapatihan, may komon nga panan-awan, kag may malawig nga kasaysayan sang pag-updanay.
“I am hopeful that this unshakeable alliance, tested in war and peace, will be a force of good that will blaze a path of prosperity and amity, in the region, and in both sides of the Pacific,” suno kay Marcos.
Ginsiling man sini nga nagapabilin nga committed ang Pilipinas sa sini nga alyansa bangud natukod ini sa kahilwayan kag sa demokrasya.
“This is a durable partnership the Philippines is fully committed to because it is founded on the ideals we share: freedom and democracy.”
Sa hingapusan sang statement, ginpahayag ni Marcos nga nakilala niya si Trump sang bataon pa ini kag nakahibalo siya nga ang liderato sini ang maga-resulta sa maayo nga buwasdamlag para sa tanan.
Si Trump, 78-anyos kag 45th president sang USA, ang magabalik sa White House kag amo ang mangin ika-47 nga presidente sang pungsod matapos ginlutos sa kampanya si Vice President Kamala Harris sang Democrats.
Nakuha na sini ang masobra 270 Electoral College votes nga kinahanglan agud ma-secure ang presidency.
As of 5:45 a.m. ET (1045 GMT), na-secure ni Trump ang 279 electoral votes kontra sa 223 nga nakuha naman ni Harris.#
