Ginhangkat ni President Ferdinand Marcos, Jr. ang China sa isa ka kasugtanan kaangot sa pag-pull out sang Typhon missiles sang Estados Unidos sang Amerika nga yara subong sa pungsod.
Suno kay Marcos, handa siya nga kuhaon ang missiles sang US kun untaton man sang China ang ila agresibo nga mga aktwasyon kag pagpang-harass sa mga manugpangisda nga Pinoy sa West Philippine Sea.
Dugang sini, dapat nga untaton man sang China ang paggamit sang water cannon kag lasers amo man ang pagpangbunggo sa mga vessel sang Pilipinas.
“Let’s make a deal with China: Stop claiming our territory, stop harassing our fishermen and let them have a living, stop ramming our boats, stop water cannoning our people, stop firing lasers at us, and stop your aggressive and coercive behavior, and I’ll return the Typhon missiles. Itigil nila ‘yung ginagawa nila, ibabalik ko lahat ‘yan,” suno kay Marcos.
Ini nga statement sang presidente ang ginbuy-an matapos nagpahayag si Chinese foreign ministry spokesperson Mao Ning nga dapat nga tadlungon sang Philippine government nga sala sini nga ginahimo sa labing-madali nga tion paagi sa pag-pullout sa missile launchers nga una na nga gin-report nga gin-relocate lamang.
Pahayag naman ni Marcos, indi siya makahangop kun ngaa nagapahilabot ang China bangud wala man gani nagakomento ang Pilipinas sa missile systems sang Beijing nga indi hamak nga mas gamhanan.
“Well, I don’t understand the comments on the Typhon missile system. We don’t make any comments on their missile systems, and their missile systems are a thousand times more powerful than what we have,” dugang sang chief executive.
Una na nga ginkumpirma sang isa ka senior Philippine government source nga ginsaylo sang US military ang Mid-Range Capability missile system halin sa Laoag airfield pakadto sa isa ka lokasyon sa Luzon.
Gin-alegar nga ini nga redeployment ang makabulig sa pagtumod kun ano kadasig masaylo ang missile battery sa bag-o nga firing position.
Ini nga Tomahawk cruise missiles sa launchers ang sarang maka-igu sang mga target sini pati sa China kag Russia kun ipalupad ini halin sa Pilipinas.
Ang SM-6 missiles naman ang mahimo maka-igu sang air kag sea targets apisar sa kalayuon nga 200 kilometros.
Una naman nga ginklaro sang Philippine Army nga indi man paggamiton ang Typhon missile launchers sa live-fire exercises sa palaabuton nga military drills kundi gamiton lamang para sa training sa payload delivery system.
