Nagbalos si former President Rodrigo Duterte matapos ang sunod-sunod nga mga pagpalagtik nga ginhimo ni President Ferdinand Marcos Jr. sa mga campaign rally para sa 2025 midterm elections.
Sa indignation rally sa Mandaue City, Cebu, Pebrero 22, kun sa diin personal nga nagtambong ang anay punong ehekutibo kaupod ang iya mga gina-endorso nga mga kandidato sa pagka-senador, ginsiling sini nga antes magtakop ang termino ni Marcos sa 2028, magapatuman ini sang martial law.
Suno kay Duterte, ilugon ni President Marcos ang ginhimo ni former President Ferdinand Marcos Sr. para magarantiya nga wala sang eleksyon kag mapalawig pa ang iya pagtinir sa Malacañang.
”Si Mr. Marcos is veering towards a dictatorship. Mo pusta ko sa inyo, dili na manaog pagkahuman sa iyang termino. Pareha na sa iyang tatay, magkagubot na pud ta because ang iyang buhaton mag-declare na pud ug martial law pareho sa iyang papa. ‘Pag martial law, walay eleksyon,” suno kay Duterte.
Madumduman nga sang Septyembre 1972 sang nagdeklarar ang amay nga Marcos sang martial law kag nagpabilin sa opisina bilang presidentE sang pungsod tubtub nga napahalin ini paagi sa EDSA People Power Revolution sang Pebrero 1986.
Sa iya speech, naghingyo man ang former president sa militar kag pulis nga maghimo sang moral decisions kag indi pagsakyan ang ambisyon sang isa ka tawo. Duha lamang ang pilian sang soldado kag pulis suno kay Duterte nga amo ang sayop kag ang matarong.
”Kamong mga sundalo ug pulis paminaw mo, kanang ambition sa usa ka tao ayaw mo ug pagsakay kay madugay o madali matapos man gyud na, unya illegal mana. Pamili mo, duha ra mana, naay sayop, naay tama,” dugang sini sa iya nga speech.
Matandaan nga sang nagligad nga semana, gintawag man ni Duterte si Marcos nga bangag kag nagagamit sang iligal nga droga. Nagbalos man si President Marcos kag nagsiling nga ang iya mga kandidato ang wala naga-apin kag nagahugyaw para sa China, wala naga-akto bilang sakristan sa sala nga propeta nga may kaso sa pagpang-abuso, wala nagpangbulsa sang kuwarta sang gobyerno sang may pandemya, kag wala sang mantsa sang dugo ang ila mga kamot sa war on drugs.#
