Nanindugan si Senator Risa Hontiveros nga indi pwede maka-upod si President Ferdinand R. Marcos Jr. sa Kongreso kun mag-umpisa na ang 2026 budget deliberations.
Suno kay Hontiveros, bisan willing pa ang president, indi niya ini mahimo bangud ginadumilian sang Konstitusyon nga himuon niya ini bilang chief executive sang Pilipinas.
Bastante na suno sa opposition lawmaker nga ipadala sang ehekutibo ang national expenditure program sa Kamara, kag kun makaabot na ini sa lower chamber, yara na sa kamot sang lehistatura ang trabaho.
Pahayag pa sini, magabalik lang ang obligasyon sa Office of the President kun makahimo na ang Kongreso sang consolidated bicameral conference committee report sa proposed budget.
Diri na kag magadesisyon si Marcos kun pirmahan sini ang budget ukon mag-apply sang line-item veto.
Ini nga reaksyon ni Risa ang kasunod sang statement ni Budget Secretary Amenah Pangandaman nga sang na-finalize na ang 2025 national budget, may instructions gilayon ang president para sa pondo sa masunod nga tuig. Ginsiling man ni Pangandaman nga kun kinahanglanon ang presensya ni Marcos, magapungko ini sa bicameral conference committee kag mag-upod sa bicam process.
