Ginsabat na ni President Ferdinand Marcos, Jr. ang isa sa pinakaulihi nga tirada ni anay President Rodrigo Duterte batok sa iya kun sa diin ginpangmuno ang iya nga sunod-sunod nga byahe sa luwas sang pungsod.
Kaangot ini sa natabo sa nagligad nga gab-i sa “Laban Kasama ang Bayan” Prayer Rally sa Liwasang Bonifacio, Maynila kun sa diin ginpahayag ni Duterte nga nagalagaw-lagaw lamang si Marcos.
Natabuan man nga yara si Marcos sa Berlin,Germany para sa duha ka adlaw nga working visit kag ginsundan man sang iya working visit sa Prague, Czech Republic.
Antes ini nga byahe ni Marcos sa Europa, halin man siya sa state visit sa Canberra, Australia kag nagbalik pa gid sa Melbourne sa amo man nga pungsod agud magtambong sa special summit kaupod sa iban nga Southeast Asian Leaders sang nagligad man nga semana.
Ang byahe ni Marcos sa Europa subong amo na ang iya nga ika-24 nga byahe sa luwas sang pungsod halin sang nagpungko siya bilang presidente sa Pilipinas sang 2022.
Nagsabat naman si Marcos paagi sa pagpakita sang iya nga schedule agud pamatud-an nga wala siya nagalagaw-lagaw lamang.
“It’s my schedule for today. Where’s the (paseo?) Wala. You know, kasama ko… we don’t make pasyal, even in the places that I spent a lot of times with, ‘di ko napupuntahan ‘yung mga dati kong pinupuntahan because we’re here to do this,” suno sa presidente.
Gin-ako man ni Marcos nga nagalibog na ang iya ulo bangud nagalain-lain na ang opinyon ni anay Presidente Duterte sa iya. Kinahanglan anay suno sa presidente nga tun-an ang pinakaulihi nga mga tirada ni Duterte agud mahangpan sini sang maayo.
“Nako-confuse kasi ako kay PRRD (Duterte), papalit-palit, eh. I’ll have to examine it further…Tingnan ko muna kung ano ba talaga ang sinabi niya para maintindihan ko,” suno kay Marcos.
Matandaan nga una na nga ginkontra ni Duterte ang ginaduso nga charter change paagi sa ginasulong nga Peoples Initiative.
May sunod man ini nga pahayag nga “okay” lang sa iya ang “charter change” kun wala man ini nagatuyo nga palawigon ang termino sang mga nagapuwesto na sa posisyon.
May pahayag man ini sang una nga bangag kag drug addict si Marcos, apang sang ulihi, nag-todo-panginwala na ini kag nagsiling nga bisan patyon siya sang isa ka libo ka beses, wala siya nakahambal nga drug addict ang presidente.
Sa pihak sang sulit-sulit nga atake ni Duterte, ginklaro ni Marcos nga wala siya nagapang-personal. Sa pagkamatuod suno sa iya, wala sang problema sa iya kun mag-greet siya para sa birthday ni Duterte sa maabot nga Marso 28.
“Hindi ako namemersonal. Para sa akin, hindi naman madali, pero nahihiwalay ko yung trabaho at saka yung personal,” dugang sini.#
