Magapatigayon si Presidente Ferdinand “Bongbong” Marcos Jr. sang lima ka adlaw nga working visit sa Singapore halin subong nga adlaw, Oktubre 7, tubtob sa Domingo, Oktubre 11.
Lakip sa iya mga aktibidad ang pag-istorya sa mga paagi para mapabakod ang relasyon sang Pilipinas kag Singapore, mapadasig ang investment sa Pilipinas, kag ma-align ang mga prayoridad sang ASEAN para mas mangin preparado sa nagabag-o nga mga kahimtangan sa rehiyon.
Ini ang ikalima nga pagbisita ni Marcos sa Singapore kag ika-47 niya nga overseas travel halin sang nangin presidente siya sang 2022.
Suno sa Malacañang, magapakigkita si Marcos sa mga lider sang negosyo kag investors bilang kabahin sang 24th Forbes Global CEO Conference kun sa diin iya ipresentar ang investment kag economic priorities sang Pilipinas.
Magabisita man ang presidente sa Singapore Nuclear Research and Safety Institute para mahibaluan ang expertise sang Singapore sa nuclear technology kag safety.
Magapakigkita man si Marcos kay Singapore Prime Minister Lawrence Wong kag magatambong sa isa ka dinner nga iya gin-host sa sidelines sang Formula One Singapore Grand Prix 2026 sa diin personal nga gin-imbitar ang presidente.
Suno sa Department of Foreign Affairs (DFA), isa man ini ka oportunidad para mapabakod ang kooperasyon sang Pilipinas kag Singapore sa trade, investment, defense, digital technology, renewable energy, health care kag iban pa nga larangan.
Ang mga upod ni Marcos sa biyahe amo sanday Finance Secretary Frederick Go, Trade Secretary Ma. Cristina Roque kag Presidential Communications Secretary Dave Gomez.
