Mainit nga gin-abi-abi si President Ferdinand Marcos Jr. sa iya pag-abot sa United States Indo-Pacific Command sa Honolulu, Hawaii.
Nagpakigkita ang presidente sa security officers sa headquarters sa pagpanguna ni Commander Admiral John Aquilino.
Una na nga ginkumpirma ni National Security Adviser Eduardo Año nga mangin kabahin ang sitwasyon sa West Philippine Sea sa diskusyunan kadungan sang pagbisita ni Marcos.
Suno kay Año nga isa man anay ka military chief, ang pagbisita ni Marcos ang nagapakita sang importansya sang alyansa sang Pilipinas sa Amerika sa tunga sang nanuhay-tuhay nga geopolitical issues ilabi na ang nagasaka nga tensyon sa West Philippine Sea bangud sa pagpang-harass sang China.
Ang Indo-Pacific Command amo ang pinakatigulang kag pinakadaku sa 11 ka unified combatant commands sang Estados Unidos sang Amerika.
Responsable man ini sa tanan nga aktibidad sang militar sang Amerika sa Indo-Pacific region kun sa diin covered ang 36 ka mga pungsod, 14 time zones, ukon ang halos 50% sang populasyon sang bilog nga kalibutan.
Ang commander sini amo ang responsable sa ginabanta 380,000 soldiers, sailors, marines, airmen, guardians, coast guardsmen kag civilian forces sang United States Defense department. #
