Gin-insister ni Presidential aspirant kag former Senator Ferdinand “Bongbong” Marcos Jr. nga nakakuha siya sang degree halin sa University of Oxford.
Baliskad ini sa mga alegasyon nga ginahaboy sang iya nga mga kritiko nga special diploma lang ang iya nga nakuha halin sa amo nga unibersidad.
Sa isa ka radio interview subong nga Sabado, ginpahayag ni Marcos, “Well, naipakita ko na ang diploma ko. It is a degree course. So yeah, naggraduate ako sa Oxford.”
Kun balik-balikan ang statement sang kampo ni Marcos sang Oktubre 2021, ginpahayag ni chief of staff kag spokesperson Atty. Victor Rodriguez nga ginatindugan sang ila nga kampo nga may Degree confirmation nga nakuha si Marcos halin sa University of Oxford.
Sang amo man nga bulan, nagpa-guwa sang statement ang Oxford Philippines Society, grupo sang Filipino students kag alumni sang Oxford, nga wala sang degree si Marcos halin sa amo nga university.
Ginapahayag nahatagan lang si Marcos sang Special Diploma in Social Studies sang 1978. Ang Special Diploma indi degree suno sa grupo kag indi man “comparable, superior, ukon equivalent” sa degree. ##
