Ginmanduan ni President Ferdinand Marcos Jr. ang Philippine Coconut Authority (PCA) nga padasigon ang modernisasyon sa industriya sang niyog sa pungsod agud mahimo ang Pilipinas nga isa ka major coconut exporter.
Pahayag ini sang presidente kadungan sang ika-50 nga anibersaryo sang PCA.
“Let us double our efforts to tackle these issues and invest in technologies and initiatives that will not only safeguard but also ensure the resilience of the coconut sector of our agriculture,” pahayag sang presidente.
Antes sini, madamo ang nagaduso kay Marcos nga siguraduhon nga magamit gid ang coco levy fund agud masuportahan sang maayo ang amo nga industriya.
Ang coco levy fund isa ka daku nga kontrobersiya sang tion ni former President Ferdinand Marcos Sr. kun sa diin binilyon nga balor sang coconut levy ang nakolekta gikan sa coconut farmers agud itib-ong sa coconut research kag iban pa nga programa sang amo nga sector.
Sang ulihi, gin-alegar nga gingamit sang late president kag sang iya cronies ang amo nga kuwarta para sa ila kaugalingon nga interes, partikular na sa pagbakal sang United Coconut Planters Bank kag majority stake sa San Miguel Corp.
Sang 2012, nagpaguwa sang desisyon ang Supreme Court nga ginapanag-iyahan sang state ang amo nga pondo.
Sa statement naman sang PCA, ginpahayag nga ang coconut industry ang nagapabilin nga top dollar-earning export sang Pilipinas.
Sang 2021, nagpanguna, nagpang-apat, kag nagpang-pulo sa export ang coconut oil, desiccated coconut, kag ang copra oil cake.
Suno sa Presidential Communications Office, nagsaka man ang coconut production sang 1.6 percent halin sa 3.20 million metric tons sang first quarter sang 2022 pasaka sa 3.26 million metric tons sa first quarter sang 2023. #
