Nagmandu si President Ferdinand Marcos Jr. sa disaster officials sa Pilipinas nga padayunon ang relief operations sa mga lugar sa Mindanao nga naapektuhan sang 6.8 magnitude nga linog.
Photo: PCO
Suno sa Presidential Communications Office (PCCO), kabahin ini sang naistoryahan sa virtual meeting sang presidente kaupod kanday Defense Secretary Gilbert Teodoro; Health Secretary Teodoro Herbosa; Social Welfare Undersecretary Edu Punay; Office of Civil Defense (OCD) Undersecretary Ariel Nepomuceno kag iban pa nga government officials.
Ginsugo man ni Marcos nga padayunon ang pag-monitor sa sitwasyon ilabi na ang posible nga aftershocks.
Sa Hawaii subong si Marcos matapos nagtambong sa APEC Leaders’ Summit sa San Francisco, California.
Natalana ini nga magbisita sa US Indopacom Headquarters, magtambong sa barge tour kag wreath-laying ceremony, kag may meeting man sa Daniel Inouye Asia Pacific Center for Security Studies.
Sa pihak nga bahin, sandig sa rekord sang National Disaster Risk Reduction and Management Council (NDRRMC), nagsaka na sa walo ang napatay kag 23 ang nasamaran sa linog nga nagtay-og sa lain-lain nga bahin sang Mindanao sang Byernes sang hapon. #
