Ginpaathag ni President Ferdinand Marcos, Jr. kun ngaa nagguwa ang statement sang gobyerno nga “misunderstanding kag aksidente” lamang ang natabo sa Ayungin Shoal sang Hunyo 17 kun sa diin gin-harass sang China Coast Guard (CCG) ang rotation and reprovisioning (RORE) mission sang Pilipinas rason nga nagkalaguba ang mga gamit kag nautdan pa sang tudlo ang isa ka Navy personnel.
Matandaan nga si National Maritime Council chairman kag Executive Secretary Lucas Bersamin ang nagtawag sa amo nga hitabo nga aksidente lang bangud wala pa ini suno sa iya ginakabig nga armed attack — statement nga ginpakamalaot naman sang publiko kag ginbawi man ni Defense Secretary Gilberto Teodoro.
Suno naman kay President Marcos, sang adlaw nga ginhimo ang statement, gina-check pa ang dugang nga mga data.
Ginsiling sini nga sang ginbisita sini ang Western Command (WESCOM) sang Armed Forces of the Philippines (AFP) sa Palawan sang nagligad nga semana, didto pa lang nahangpan kun ano gid ang ginhimo sang China agud punggan ang RORE mission pakadto sa BRP Sierra Madre.
Indi ini aksidente suno kay Marcos bangud ginhungod gid ini sang CCG.
“Mula nung napunta ako sa WESCOM at nakausap ko [si] Admiral Torres, lahat pati na ibang mga seaman, sinabi ko, ‘ano ba ang nangyari?’ Maliwanag hindi misunderstanding. Talagang pinuntahan tayo para harangin,” suno sa chief executive.
Wala man ini gintawag sang commander in chief nga “armed attack” bangud wala man sang nagpalupok, apang ginlaragway niya ini nga “deliberate” kag “iligal.”
“It’s not armed. Walang pumutok. Hindi tayo tinutukan ng baril. But it was deliberate. It was a deliberate action to stop our people. They boarded a Philippine vessel, and took the equipment from the Philippine vessel. So, although there (was) no ambush involved, nonetheless, it is still a deliberation action and it is essentially an illegal action that was taken by the Chinese forces,” suno sa presidente.#
