Nagpanawagan si President Ferdinand “Bongbong” R. Marcos Jr. nga suportahan ang tuyo sang Pilipinas nga makapwesto sa United Nations Security Council (UNSC).
Sa Vin d’Honneur sa Malacañan Palace, ginpahayag ni Marcos sa atubang sang mga ambassador nga nagapangabay siya sa ila nga mga gobyerno nga hatagan sang suporta ang Pilipinas para maangkon ang non-permanent seat sa council sa termino sa 2027-2028.
Ang Security Council amo ang responsable sa pagpabilin sang international peace and security. 15 ang miyembro sini kag kada miyembro ang may isa ka boto.
Ang China, France, Russian Federation, United Kingdom, kag United States amo naman ang lima nga permanent members.
Sa idalom sang United Nations charter, ang tanan nga member states ang obligado sa pag-comply kun ano man ang mangin desisyon sini nga council.
Ulihi nga nakaangkon ang Pilipinas sang isa sa elected seats sa Security Council sang termino sang 2004-2005.
“I take this opportunity anew to convey to your respective governments our earnest request for your support to our UNSC bid, and we hope for your support when the time comes when we are indeed sitting as a member of the Security Council,” kabahin sang speech ni Marcos.
Suno sa chief executive, masangkad na ang eksperyensya sang Pilipinas sa pagpabilin sang kalinong kag pagpangita sang banas para sa kooperasyon sa iban nga mga pungsod.
Wala-punaw man ang kontribusyon sang Pilipinas sa UN Peacekeeping operations sa nagligad nga anum ka dekada lakip na ang pagpadala sang masobra 14,000 ka tropa sa 21 UN Peacekeeping operations kag special political missions.
“Nowhere is this best highlighted than in our unfaltering contribution to UN Peacekeeping Operations over the past sixty years, deploying over 14,000 troops in 21 UN peacekeeping operations and special political missions,” dugang sini.
Sang Septyembre 2024, nag-isyu sang kaangay man nga statement si Foreign Affairs Secretary Enrique Manalo sa UN General Assembly sa New York.
Ginplastar sini ang constructive solutions nga matanyag sang Pilipinas sa nagkalain-lain nga trabaho sang United Nations – halin sa human rights, health and humanitarian action pakadto sa development, disarmament, kag disaster and climate risk reduction, kag halin naman sa peacemaking pakadto sa peacekeeping kag peace building.
Sang nagligad nga tuig, ginsiling sang UN nga nag-improve na ang relasyon sini sa Pilipinas sa idalom sang Marcos Jr. administration apang may mga nakit-an pa nga pagpanghangkat nga dapat pa nga maresolba.
