Nagpasalig si President Ferdinand Marcos, Jr. kay Education Secretary Sonny Angara nga i-address sini ang isyu sa pagbuhin sang P12-billion sa 2025 budget sang Department of Education (DepEd).
Suno sa tiglikom, mismo si President Marcos ang nagpahayag nga remedyuhan niya ini.
Ginplastar sang former senator nga halin pa sang nagliligad nga tinuig, ginapasakaan sang Kongreso ang proposed budget para sa DepEd kag iban pa nga para sa edukasyon, apang masubo nga sa 2025, may budget cut nga himuon.
“In past years, Congress has increased the President’s proposed budget for DepEd and education. For whatever reason, nakakalungkot na hindi ito mauulit sa 2025 budget,” suno kay Angara.
“Budgeting is really about priorities and education is too important to not be a funding priority. Pero ang maganda dito, mismong si President Bongbong ang nagsabi sa amin na reremedyohan niya ito,” dugang sini.
Matandaan nga gin-aprubahan sang bicameral conference committee ang P6.352-trillion nga 2025 General Appropriations Bill sang nagligad nga semana.
Nalakip diri ang pagkakas sang P12-billion halin sa DepEd ukon halin sa proposed P748.65-billion pasarurot sa P737-billion. Magluwas diri, may ibuhin man nga P30-billion halin sa Commission on Higher Education (CHED).
Bisan mas mataas matuod ang 2025 budget ipaanggid sa 2024, ginpahayag ni Angara nga kulang gihapon ini para matatapan ang kinahanglanon sang mga personnel kaangay sang pag-hire sang bag-o nga mga manunudlo kag pag-implementar sang salary adjustments sa idalom sang Salary Standardization Law.
Nagpaguwa naman sang statement ang Teachers’ Dignity Coalition nga ang desisyon sa budget cut bisan pa may nagakatabo nga learning crisis ang nagapakita lamang sang kontradiksyon sa pahayag sang gobyerno nga ginahatagan nila sang prayoridad ang edukasyon.
Magluwas nga maulihi ang mga estudyante sa tekonolohiya suno sa grupo, daku man ini nga tampa sa mga manunudlo nga overworked kag underpaid kag mapilitan pa nga magsabat sang mga kinahanglan sa ila nga classrooms.
Base sa nauna nga statement sang Presidential Communications Office, ginalauman nga pirmahan ni President Marcos ang 2025 national budget sa Disyembre 20 ukon sa Biyernes nga adlaw.#
