Ginpasalig ni President Ferdinand Marcos, Jr. nga padayunon ang mga lihok agud masigurado nga masarangan gihapon sang Filipino consumers ang presyo sang mga balaklon sa pungsod.
Kabahin ini sang statement sang presidente matapos gin-report sang Philippine Statistics Authority (PSA) nga nagtupa sa 3.3 percent ang inflation rate sa Pilipinas sang Agusto nga mas manubo sa 4.4% nga napagkit sang Hulyo.
Suno kay Marcos, makabig nga kadalag-an para sa kada Pilipino ang mas manubo nga inflation.
“Ngayong araw, ipinagdiriwang natin ang isang tagumpay para sa bawat Pilipino. Bumagsak ang inflation sa 3.3% ngayong Agosto mula sa 4.4% noong Hulyo,” pahayag sang chief executive.
Ginplastar sini ang mga tikang sang gobyerno kaangay sang pagbuhin sa taripa sa bugas kag ang pagbukas sang Kadiwa stores.
Sa pagbuhin sa taripa suno sa iya, napanubo ang rice inflation halin sa 20.9 percent pa-us-os sa 14.7 percent kag ang meat inflation halin sa 4.8 percent panubo sa 4.0 percent.
Gindugang man sini nga tuyo sang gobyerno nga pasangkaron pa ang Kadiwa program sa Visayas kag Mindanao para nga mangin kasarangan ang presyo sang basic goods.
Pahayag pa sini, gin-umpisahan naman ang controlled roll-out sang African Swine Fever (ASF) vaccines para masiguro ang bastante nga pork supply kag malikawan ang price hike sa karne sang baboy.
“These are concrete steps we’re taking to make sure that the ‘Bagong Pilipinas’ we promised is felt where it matters most – at home. We will continue moving forward to ensure that every Filipino will achieve a more comfortable life through quality jobs and affordable goods,” pahayag ni Marcos.
“Patuloy ang trabaho. Ipagpapatuloy natin ang pag-usad upang matiyak na makakamtan ng bawat Pilipino ang mas komportableng buhay—sa pamamagitan ng dekalidad na trabaho at murang bilihin. Para sa bawat Pilipino, para sa Bagong Pilipinas,” dugang sini.
Nahibaluan nga suno sa PSA, ang pagnubo sa inflation sang Agusto ang kasunod man sa paghagan-hagan sa pagsaka sa presyo sa pagkaon kag transportasyon.
Sulod ang 3.3 percent sa 3.2-to 4-percent nga forecast sang Bangko Sentral ng Pilipinas (BSP) para sa Agusto.#
