Nakabalik na sa Pilipinas si President Ferdinand Marcos, Jr. matapos ang lima ka adlaw nga state visit sa India.
Naghugpa sa Villamor Air Base 8:06 subong nga gab-i ang eroplano sakay si Marcos kag ang bilog nga delegasyon nga nagkadto sa New Delhi.
Sa iya arrival statement, ginpakigbahin sini nga nangin produktibo ang iya byahe kag naka-angkon sang 13 bilateral kag 18 business agreements sa India.
Dugang pa suno sa iya, nagpahayag sang interes nga mag-invest sa Build Better More program ang infrastructure conglomerate nga GMR Group ilabi na sa airport kag energy projects lakip na ang Sangley Airport project.
Sang Martes, matandaan nga nag-anunsyo si Marcos kag si Prime Minister Narendra Modi nga ginpasaka ang status sang relasyon sang duha ka nasyon sa “strategic partnership”. Ang iban pa nga “strategic partners” sang Pilipinas amo ang Japan, Australia, South Korea, kag Vietnam.
Ginsulit man sang presidente ang panawagan sini para nga ma-establisar ang Philippine-India Preferential Trade Agreement nga ginlaragway niya bilang “strategic platform” agud nga mapaayo pa ang kusog sang duha ka nasyon kag mapabakod ang ila nga economic partnership.
Sa separado nga bilateral meeting kay Indian President Droupadi Murmu, ginlaragway ni Marcos ang iya nga state visit bilang isa sa pinakaproduktibo kag “constructive visits” nga iya nahimo bilang punong ehekutibo.
