Ginkumpirma sang Malacañang nga nakabiya na sa Pilipinas si President Ferdinand Marcos Jr. kag nagpadulong sa United Arab Emirates para sa working visit.
Suno sa palasyo, nakahalin ang chief executive 9:11 subong nga gab-i.
Kaupod sini sa byahe si former Interior Secretary Benhur Abalos bangud ginpahayag nga may “close ties” ini sa UAE royal family.
Lakip man sa delegasyon sang Pilipinas sanday Environment Secretary Toni Loyzaga, National Commission for Culture and Arts chairperson Vic Manalo, kag Foreign Affairs Undersecretary Charles Jose.
Samtang yara sa UAE, magapakigkita ang presidente kay His Highness Sheikh Mohamed bin Zayed Al Nahyan sa Abu Dhabi buwas, Nobyembre 26.
Ini na ang pang-31 nga international trip ni Marcos subong nga tuig kag natabo isa ka bulan matapos ang UAE-based firms nga DP World kag Masdar ang nagpabutyag sang interes nga mag-invest sang masobra P25 billion sa renewable energy kag port projects diri sa Pilipinas.
Sang Hunyo, matandaan nga nagbisita man si High Highness Al-Nahyan diri sa Manila.
Una naman nga ginplastar sang Presidential Communications Office paagi kay Acting Secretary Cesar Chavez nga sanday Executive Secretary Lucas Bersamin, Justice Secretary Jesus Crispin Remulla, kag Agrarian Reform Secretary Conrado Estrella III ang mangin kabahin sang caretake committee samtang yara pa sa luwas sang pungsod si Marcos.#
