Apisar sang makatulublag nga ginhimo sang China Coast Guard sa resupply mission sang mga soldado nga Pinoy sa Ayungin Shoal sang Hunyo 17 kun sa diin isa ka Navy personnel ang nautdan sang tudlo, nagpanindugan si President Ferdinand Marcos, Jr. nga indi ini pagsundon sang Pilipinas bangud indi sini tuyo nga mag-umpisa sang gyera batok sa anuman nga nasyon.
Indi maggamit sang pwersa ang Pilipinas suno kay Marcos agud nga halitan ukon samaran ang bisan sin-o sa West Philippine Sea.
“We are not in the business to instigate wars – our ambition is to provide a peaceful and prosperous life for every Filipino. This is the drum beat, this is the principle we live by and that we march by,” pahayag sang commander in chief kadungan sang Talk To Troops kag iya pagbisita sa Western Command Headquarters sa Camp General Artemio Ricarte sa Puerto Princesa City, Palawan kahapon, Hunyo 23.
Ini nga unit sang militar amo ang nagapanguna sa pagbantay sa West Philippine Sea nga gina-claim man sang China.
“We refuse to play by the rules that force us to choose sides in a great power competition. No government that truly exists in the service of the people will invite danger or harm to lives and livelihood,” dugang sini.
Apisar nga indi mag-umpisa sang gyera, gin-athag ni Marcos nga indi magpatapak-tapak ang Pilipinas sa bisan kay sin-o man.
“We owe to our forefathers the duty to keep the freedoms that they fought, bled, and died for; and that we presently enjoy. Kailanman ay hindi tayo magpapa-supil at magpapa-apikahit na kanino man,” dugang sini.
Ginpahayag man sini ang iya pagsaludo sa 80 ka mga soldado nga nangin kabahin sang rotation and reprovisioning (RORE) mission sa BRP Sierra Madre sa Ayungin Shoal.
Gindayaw sini ang pagpugong sa kaugalingon kag propesyunalismo nga ginpakita sang mga Pinoy apisar ginpalibutan kag ginpahog na sang China Coast Guard nga may mga dala pa nga wasay, binangon, kutsilyo, kag mga stick.
Ang Ayungin Shoal ukon ang Second Thomas Shoal ang ginatawag man sang China nga Ren’ai Reef. Nahamtang ini 105 nautical miles sa nakatundan ang Palawan kag sulod sa 200-mile exclusive economic zone (EEZ) sang Pilipinas kag parte pa sang continental shelf sang pungsod.
