Ginpasigurado ni President Ferdinand Marcos Jr. nga mapahalin sa serbisyo kag pasakaan sang kaso ang mga opisyal sang gobyerno nga nagbulig agud makapalagyo si dismissed Bamban, Tarlac Mayor Alice Guo.
Ini ang ginpahayag sang presidente kadungan sang pagdakop sang Indonesian authorities kay Guo.
“All of those who are implicated…in assisting Alice Guo to leave the Philippines illegally as a fugitive from justice will certainly pay the price.”
Suno kay Marcos, paglapas sa layi ang ginhimo sang mga opisyal nga nagbulig agud makapalagyo si Guo sa Indonesia.
“Ang tanong ‘nyo, sino ‘yung sisibakin? Hindi lang namin sila sisibakin, kakasuhan pa namin sila dahil ang kanilang ginawa ay labag sa batas at against all of the interests of the Philippine judicial system.”
Si Guo ang sa subong, yara sa sentro sang kontrobersiya bangud sa kaangtanan sini sa Philippine offshore gaming operator (POGO) sa iya nasakupan nga banwa nga gin-raid sang mga otoridad.
Magluwas diri, gina-akusaran man si Guo nga isa ka Chinese spy.
Ginpahayag man ni Marcos nga magaserbe nga paandam ang ginhimo ni Guo nga indi mag-untat ang mga otoridad tubtob indi manabat ang mga naglapas sa layi sang Pilipinas.
Sa subong, ginapadasig na suno sa presidente ang pagpauli ni Guo sa Pilipinas.
Nagpasalamat man ini sa Indonesian government bangud sa pagbulig agud madakpan si Guo.
“The close cooperation between our two governments has made this arrest possible.”
