Pangunahan nanday President Ferdinand Marcos, Jr. kag Vice President Sara Duterte ang opening ceremony sang 2024 Palarong Pambansa sa Cebu City Sports Center subong nga adlaw, Hulyo 9.
Ang attendance ni Marcos ang ginkumpirma sang Cebu City Sports Commission samtang nauna naman ang bise-presidente kag outgoing secretary sang Department of Education (DepEd) sa pag-anunsyo sang iya pagtambong sang nagligad nga semana.
Sa inisyal nga reports, nakasaad nga si Duterte ang magapakilala sa chief executive bilang keynote speaker.
Ini nga tuigan nga multi-sports meet para sa grade school athletes ang magapatigayon sang traditional parade of colors sa grand ceremony kun sa diin mangin highlight ang lighting of the cauldron amo man ang pagtukar sang 2024 theme song nga “Palarong Pambansa Cebu City.”
Sa sini nga event, 933 ang delegasyon sang Western Visayas kun sa diin 601 ang mga atleta — 214 sa elementarya, 346 sa sekondarya kag 41 naman sa Para Games.
Sa interview sang Bombo Radyo kay Mr. Hernani Escullar, Jr., public information officer sang DepEd Region 6, iya ginpahayag nga tinguhaan sang mga atleta sang rehiyon nga maagaw sa National Capital Region (NCR) ang kampyonato subong nga tuig.
Madumduman nga nagtapos ang Region VI bilang first runner-up sang nagligad nga tuig nga may 60 gold medals, 45 silver, kag 44 bronze medals.
Depensahan man ukon lapawan pa sang Rehiyon 6 ang tatlo ka regional records nga na-set sini sang 2023 kun sa diin duha ang sa swimming kag isa sa athletics.
Espesyal man ini nga tuig para sa Western Visayas bangud ini ang katapusan nga tion nga makaupod sini ang Negros Occidental sa Palarong Pambansa bangud ang amo nga probinsya ang nag-separar na kag sakop na sang bag-o lang napirmahan nga Negros Island Region (NIR).#
