Kun sang nagligad nga semana nagtipon ang Duterte supporters sa EDSA Shrine, naghimo man sang kaangay nga pagtilipon ang mga taga-suporta ni President Ferdinand “Bongbong” Marcos Jr. sa People Power Monument sa EDSA sa Quezon City.
Nag-umpisa sila sa pagkadto sa amo nga lugar alas dies sa aga kahapon, Disyembre 7.
May pila ka attendees nga nagpahayag nga nagatipon sila para nga suportahan ang Marcos administration.
May yara man sang iban nga nagpagunting kag nagpakalbo sa atubang mismo sang monumento kag may dala pa nga posters nga may nakabutang nga “We Stand and Protect BBM.”
Kahapon sang hapon, 1,200 na ang ila kadamuon suno sa Quezon City Police.
Nahibaluan nga ang People Power Monument ang ginpatindog bilang tribute sa mga Pilipino nga nagpanindugan batok sa pagginahum sang amay ni President Bongbong nga si anay President Ferdinand Marcos Sr. sang Pebrero 1986.
Nangin bantog ini nga venue para sa commemorative rites kaangay sang anibersaryo sang 1986 EDSA People Power revolt.
Matandaan nga sang Nobyembre 26 sang nagtipon naman ang Duterte supporters sa Our Lady of EDSA nga kilometros ang kalayuon halin sa People Power Monument.
Una nga gin-report sang Philippine National Police (PNP) nga may ginpanagtag nga P500 sa mga tawo nga magkadto sa EDSA Shrine apang ginpanginwala man ini sang supporters nanday former President Rodrigo Duterte kag Vice President Sara Duterte.
