Ginklaro sang Malacañang nga wala nahadlok si President Ferdinand Marcos Jr. sa deklarasyon ni Vice President Sara Duterte nga magapadalagan ini sa pagka-presidente sa 2028.
Suno kay Communications Undersecretary kag Palace Press Officer Atty. Claire Castro, sang una pa lamang, nabatyagan naman nila nga nagapangampanya na si Duterte, gani nga wala na sang nakibot sang nag-anunsyo ini sang iya presidential bid.
Dugang pa sang Palace official, kun ang mga ginapanghambal lang sang vice president ang panumdumon ni Marcos, pat-od nga wala na sang makapadalagan sang gobyerno.
“Ang pangulo masisindak? Hindi naman kasindak-sindak,” suno kay Castro.
“Even before, ramdam na ramdam na po ang kaniyang pangangampaniya so hindi na nakakagulat,” dugang niya. “Kung ang iisipin lang ng Pangulo ay ang mga sinasabi ng bise presidente, hindi na tatakbo ang gobyernong ito.”
Ginpanginwala man ni Castro ang mga alegasyon nga nagapangita na ang administrasyon sang potensyal nga mga kandidato nga amo ang magaatubang kay Duterte sa 2028.
Pahayag sang Palace press officer, lunsay trabaho lang ang yara sa pinsar subong sang presidente kag indi bakasyon.
“Wala pa po sa isipan ng Pangulo at ng administasyon na ito ang pamumulitika o humanap ng kandidato sa 2028… Dadating po ang panahon na iyan,” suno sa Communications official. “Hindi pa rin po ito napag-uusapan… Trabaho, trabaho, trabaho, hindi bakasyon.”
Matandaan nga sang Myerkules, Pebrero 18, sang nagdeklarar si Duterte sang iya plano sa pulitika sa 2028 national elections. Sa iya speech, nagpangayo ini sang pasaylo sa pag-upod kay Marcos bilang iya ka-tandem sang 2022 elections. Ginlaslasan man sini ang administrasyon bangud sa iya ginaalegar nga kakulang sa polisa sa imprastraktura, health care, foreign affairs, kag pagtapna sa kurapsyon kag kriminalidad.
