Naghakot sang madamo nga medalya ang bugal sang Iloilo City nga si Maria Katarina Elia Gange Tanaleon sa Rhythmic Gymnastics sa Western Visayas Regional Athletic Association Meet 2026.
Sa interview sang Bombo Radyo sa 9-anyos nga si Tanaleon, iya ginpahayag nga bangud sa bulig sang iya ginikanan kag mga coaches nangin possible para sa iya nga madala ang kadalag-an para sa Iloilo.
Suno pa sa iya nga apisar pa nagkalain-lain ang mga coaches nga naghanas sa iya gin-gamit gid sini ang mga laygay kag mga natun-an sini sa ila agud mangin kampeon sa nasambit nga kompetisyon.
Bangud sa iya nga paghimakas, nadala sini pauli ang bulawan nga medalya sa Rope Routine kag Ball Routine amo man sa Team and Individual All-Around.
Dugang pa diri, nakabaton man ini sang silver medal para sa Hoop Routine kag bronze medal naman sa Freehand Routine.
Nahibaluan nga si Tanaleon ang bugal man sang Guimaras, proud Atenean kag ang magarepresentar sang Western Visayas sa Palarong Pambansa 2026 nga pagahiwaton sa Agusan del Sur.
