ILOILO CITY- Indi mapat-od sang Maritime Industry Authority kun kinahanglanon pa ang request sa pagkuha sang resulta sang imbestigasyon sa nagluntad nga Iloilo Strait Tragedy.
Sa interview sang Bombo Radyo kay Maritime Industry Authority 6 Director Jose Venancio Vero, iya ginpahayag nga kun siya ang pamangkuton, normal lang nga magpasa sang request letter sa tion nga may pangayuon nga impormasyon sa isa ka management.
Mahimo naman suno kay Vero nga makarequest ang Iloilo City Government apang nakadepende ini sa Maritime Industry Authority Central Office kun bala iga-grant ang request ukon indi.
Sila sa Regional Office suno kay Vero ang wala man sang update kun bala ano na nga stage ang ginapatigayun nga imbestigasyon bangud wala man sang impormasyon nga ginahatag sa ila.
Samtang, gin-athag man ni Vero nga ang mandato nga gintalana sa pagpabiyahe sang mga motorbanca ang mismo ginhatag man sang Central Office, kag ginapatuman ini sa bug-os nga pungsod.
