ILOILO CITY – Magapadala sang letter of recommendation ang Maritime Industry Authority Region 6 sa central office subong nga adlaw may kaangtanan sa ginpatigayon nga Simulation Exercise tuhoy sa application sang Marina Advisory No. 2019-22 Series of 2019.
Sa interview sang Bombo Radyo kay Maritime Industry Authority Region 6 Director Engr. Jose Venancio Vero, iya ginpahayag nga wala sang may nakit-an nga problema ang ahensya sa kalaba-on kag kasangkadon sang trapal sa mga pumpboat nga nagabyahe Iloilo-Guimaras vice versa.
Suno kay Vero, ang positioning sang mga pasahero sa pump boat amo lamang ang nakit-an nga problema sang MARINA amo man sang Local Government Unit sang Guimaras.
Ipalab-ot ni Vero sa Maritime Industry Authority central office ang hingyo sang tanan nga nagtambong sa simulation exercise lakip na ang Philippine Coast Guard kag iban pa nga stakeholders nga dulaon na sa memorandum ang pagmando sa mga pasahero nga magpungko sa nauna nga bahin sang sakayang pandagat sa baylo nga sa nalikod nga bahin.
Apang nakadepende ini sa desisyon ni Maritime Industry Authority Administrator Vice-Admiral Narciso Vingson Jr., kun pasugtan ang nasambit nga hingyo.
Pahayag ni Vero, may yara sang video nga nauna na nga ginpadala sa MARINA central office bangud ini ang magabulig man sa validation sang ahensya.
Dugang pa sang natungdan, indi pa niya mapat-od kun bala makahatag gilayon sang rekomendasyon ang MARINA central office bangud ipa-idalom pa ini sa pipila ka mga validation.
