ILOILO CITY – Tatlo lamang ang mayor nga katungdanan sang Maritime Industry Authority sa repatriation sang mga Overseas Filipino Workers halin sa Metro Manila.
Sa interview sang Bombo Radyo kay Maritime Industry Authority 6 Director Jose Venancio Vero, iya ginpahayag nga wala siya nakatambong sa pagsinapol kaina kaupod ang Regional Inter-Agency Task Force bangud nga yara pa siya sa Cebu.
Suno kay Vero, lakip lamang sa katungdanan sang ahensya amo ang pagpakig-angot sa Local Government Unit nga may yara sang magapauli nga Overseas Filipino Workers, paghatag sang travel authority kag ang paghatag sang transportasyon.
Ginpahayag ni Vero nga kun Rapid test naman sa Metro Manila ang pagahambalan, ang Philippine Coast Guard na ang may katungdanan diri.
Ang ila lamang sa Maritime Industry Authority suno sa natungdan amo nga kun may yara sang quarantine pass kag resulta sang Rapid test, mahimo na nga papaulion ang OFW.
