Nagpabutyag sang kasubo kag pagkadismaya ang pila ka mga market vendors sang Mandurriao Public Market bangud sa ila sitwasyon nga pinabay-an nalang kag wala na ginasapak sang siudad matapos ang pila ka mga opening sang mga bag-o nga renovated markets.
Suno sa ila, sila ang may pinakagamay nga numero sang mga manugbaligya sa market sa siudad sang Iloilo, samtang sila man ang daw halos wala ginahatagan sang atensyon sang gobyerno.
Ginpahayag man nila nga madamo pa ang nagabakal sa ila pero indi gid madula ang kasubo nga wala sang direksyon kun san-o sila pagasayluhon sa bag-o nga building nga para man kuntani sa ila.
Nahibaluan nga subong adlaw, Dec. 1, ang soft opening sang merkado sa Arevalo, December 10 sa Jaro, kag Dec. 16 sa La Paz.
Sa interview sang Bombo Radyo kay Rolyn Gallaza, Sekretarya sang Association of Vendors sa Mandurriao Public Market, iya ginpahayag nga wala sila sang iban nga pilian kundi ang mag-agwanta sa baha kag sa magin-ot nga pwesto.
Suno man sa iya nga wala sang kasiguraduhan kun human na gid man ang bag-o nga merkado ukon wala lang ini maturn-over.
Pahayag man niya nga sa ila pagtan-aw, yara lamang sa 80 ka mga pwesto ang natapos sa bag-o nga building kun sa diin kulang ini para sa 200 ka mga vendors sang Mandurriao Market.
Pahayag man niya nga daw pirme lang sila ulihi kaangay sang natabo sa ila Mandurriao Plaza kag sa subong sa ila naman nga merkado.
