Love is a timeless force that binds people together.
Kun magpakasal ang duha ka tawo, isa ini ka lifelong commitment, apang sa panahon subong nga wala-tuo nga pagbulaganay, matuod pa bala ini?
Matuod ini para sa mag-asawa sa Brazil nga subong naga-uyat sang record sang pinakamalawig nga pag-asawahay para sa couple nga pareho pa nga buhi tubtub subong.
Ini amo sanday Manoel Angelim Dino, 105, kag Maria de Sousa Dino, 101, nga kasado sa sulod na sang 84 ka tuig kag 77 ka adlaw sang adlaw nga ginhatag sa ila ang titulo halin sa Guinness World Records.
1940 sang ginkasal sanday Manoel kag Maria sa Brazil, apang sang amo nga tion, tuman pa kalayo ang itsura kag mga hitabo sa ila pungsod.
Wala pa gani sila nakaagi daog sa FIFA World Cup sang amo nga tion, kag wala pa sang naimbento nga programmable electronic computer.
Apang halin sadto, nagbunga ang ila paghigugmaanay sang 13 ka kabataan kag masobra 100 na ang apo lakip dira ang 55 grandchildren, 54 great-grandchildren, kag 12 great-great-grandchildren.
Subong nga naga-hinunod ang ila kabuhi, updanay gihapon sila ilabi na sa pagpamati sa rosary prayer sa radio kag paglantaw sang televised mass.
Ano ang ila sikreto sa malipayon nga relasyon? Diretso ang sabat sang duha: “love.”
