𝗜𝗟𝗢𝗜𝗟𝗢 𝗖𝗜𝗧𝗬 – Nagakadapat nga ipadalom sa maid-id nga pag-usisa ang penmanship sang mga tinawo ni Vice President Sara Duterte sa Office of the Vice President (OVP) agud mahibaluan kun isa sa ila ang ginapangita nga “Mary Grace Piattos”.
Sa interview sang Bombo Radyo kay Atty. Noel Palomado, former legal officer sang Commission on Audit (COA), iya ginpahayag nga ang katuyuan sini nga matumod kun bala matuod nga tawo si “Mary Grace Piattos” nga nagpirma sa acknowledgment receipts sa mga ginpagwa nga confidential funds sang OVP ilabi na sang tuig 2022.
Mangin ang iban nga mga pangalan sa acknowledgement receipts ang ginadudahan man sang House quad committee bangud ang pirma sang mga ini ang wala sang kinalain sa pirma ni “Mary Grace Piattos” nga ginpasa sa Commission on Audit (COA).
Suno kay Palomado, may posibilidad nga gin-imbento lang ang pangalan nga “Mary Grace Piattos” gani importante nga mausisa ang penmanship sang pila ka mga tinawo sang OVP nga may papel sa paggasto sa confidential funds sang bise presidente.
Sa tion nga mapamatud-an nga ginhimo-himo lang ang pangalan nga “Mary Grace Piattos”, mahimo nga pasakaan sang kaso ang mga yara sa likod sini.
Nahibaluan nga nag-amot amot ang mga kongresista para sa P1 million nga padya sa makahatag sang impormasyon kag makatudlo kay “Mary Grace Piattos”.
