Gin-anunsyo sang Department of Justice (DOJ) nga opisyal na nga nagpasugot ang Indonesia nga sayluhon kag ibalik diri sa Pilipinas ang long-time Filipino death row drug convict nga si Mary Jane Veloso.
Suno kay Justice spokesperson Mico Clavano, may yara na sang kumpirmasyon nga ginpirmahan sang Minister for Human Rights Corrections and Immigration ang practical agreements para sa official transfer kay Veloso.
Ini nga development ang kasunod sang pagtambong sang Philippine delegation sa meeting kaupod sa Indonesian authorities subong nga Disyembre 6.
“We would like to announce (that) officially, Mary Jane Veloso is coming home,” suno kay Clavano.
14 ka tuig nga na-detain ang Pinay matapos na-convict sa krimen nga drug trafficking sang 2010 matapos nakumpiskar ang 2.6 kilograms sang heroin sa iya luggage.
Nauna diri, may separado nga statement si Yusril Ihza Mahendra, Indonesian senior minister for law and human rights affairs, kun sa diin ginpahayag sini nga tahuron sang Jakarta kun ano man ang desisyon sang Pilipinas kun makapauli na si Veloso. Lakip diri ang posibilidad nga hatagan ini ni President Ferdinand Marcos, Jr. sang clemency.
“That is (a directive) of President Prabowo. I met him two days ago during the cabinet session in the palace, and Mr. Prabowo asked me ‘How about Mary Jane?’ He remembered the name,” pahayag ni Mahendra. “He said to me that ‘Maybe you can transfer to the Philippines before Christmas. It’s a good news for the Filipino people.”
Suno kay Mahendra, ginalauman nga makapauli na ang Pinay antes ang Paskuwa. Base naman sa Philippine officials, wala pa sang eksakto nga petsa apang posible patigayunon ang pagpapauli sa iya “as soon as possible.”
Nahibaluan nga natalana kuntani ang pagpatay kay Veloso sang 2015 bilang penalidad bangud sa krimen, apang napunggan ini bangud sa last-minute arrest sa iya recruiter nga amo ang ginaalegar nagsulod sang illegal drugs sa iya bags nga lipod sa iya nga ihibalo.
