Ginapaabot nga mabuhinan ang galastuhan sa flights bangud sa natalana man nga pagnubo sang fuel surcharge sa airlines sa masunod nga bulan.
Ini ang kasunod sang lihok sang Civil Aeronautics Board (CAB) nga pagpanaog sang fuel surcharge rate sa Level 4 sa Oktubre.
Sa idalom sang sini nga lebel, ang rate para sa domestic flights ang nagatupa sa P117 tubtub sa P342, samtang sa international flights naman, naga-range ini sa P385.70 tubtub sa P2,867.82.
Ang fuel surcharge isa ka optional fee magluwas pa sa base fare nga mahimo ipasa sang airlines sa mga pasahero agud nga makabawi sa gasto nga naangkon bangud sa volatility sang jet fuel.
Una nga tion ini nga napapanaog ang rate sa Level 4 halin sa Level 5 nga gin-set sang Pebrero 2024.
Nahibaluan nga may pagnubo sa oil prices sa global market bangud sa manubo nga demand bangud sa pagpanghangkat subong sa Chinese economy nga amo ang ikaduha sa pinakadaku sa kalibutan.
Isa pa sa ginalantaw amo ang pagbaskog na sang peso nga rason kun nga indi na tuman ka taas ang fuel imports ipaanggid sang nagliligad nga mga binulan.
