Magapadalagan sa pagka-kongresista sa syudad sang Iloilo ang 80 anyos nga si Atty. Pascual ‘Junnie’ Espinosa Jr. bangud luyag niya ang maayo nga representasyon sa Kongreso. Si Atty. Espinosa ang anak ni anay Congressman Pascual Espinosa, Sr.
Sa interview sang Bombo Radyo kay Espinosa, iya ginpahayag nga lakip sa iya legislative agenda amo ang mga masunod:
* Pagdala sang binilyon nga pondo sa syudad sang Iloilo paagi sa active participation sa budget deliberation sa Kongreso
* Pag-amyendar sa 1986 Constitution bangud nagapati siya nga indi ini makabig nga people’s constitution
* kag pagduso nga himuon nga federal form of government ang subong centralized form of government
Ginpabutyag ni Espinosa nga bilang abogado, apisar 80 anyos na ang iya nga edad, may ikasarang siya gihapon, may logic, makahangop sa international law — kag makasarang sa pag-debate sa Kamara.
Gin-dismiss man sini ang notion nga nag-file lang siya sang iya nga Certificate of Candidacy (COC) agud nga magtuga sang confusion ukon pagpang-duha-duha sa mga botante.Ini bangud ang pangalan ni Espinosa ang malapit man sa pangalan ni Atty. Jose “Joe” Espinosa III, iya pakaisa, nga magapadalagan man sa pagka-Congressman sa syudad.
Suno kay Atty. Espinosa, mas nauna siya nga mag-file sang COC kag nakabati siya sang una nga indi magpadalagan sa kongreso si Joe III. “May the best man win!,” mensahe sini sa iya nga pakaisa nga isa man ka abogado.
Magluwas sa iya pakaisa, makasumpong man ni Atty. Espinosa si incumbent Iloilo Lone District Rep. Julienne ‘Jamjam’ Baronda. #
